විශේෂාංග පුවත්

මෙරට මානව හිමිකම් ආරක්ෂා කිරීම, සාමය හා සංහිදියාව ගොඩනැංවීම සම්බන්ධ දේශිය යාන්ත්‍රණයේ ප්‍රගතිය විමසා බැලීමේ සාකච්ඡාවක් ගරු අධිකරණ බන්ධනාගාර කටයුතු හා ආණ්ඩුක්‍රම ව්‍යවස්ථා ප්‍රතිසංස්කරණ අමාත්‍ය ජනාධිපති නීතිඥ ආචාර්ය විජයදාස රාජපක්ෂ මහතාගේ ප්‍රධානත්වයෙන් හා ගරු විදේශ කටයුතු අමාත්‍ය ජනාධිපති නීතිඥ අලි සබ්රි මහතාගේ සහභාගිත්වයෙන් (2022.09.01) අධිකරණ අමාත්‍යාංශ ශ්‍රවණාගාරයේදී පැවැත්විණි.

මානව හිමිකම් සුරක්ෂිත කිරීම, සංහිදියාව ගොඩ නැංවීම, ප්‍රතිසන්ධානය, අතුරුදහන් වු පුද්ගලයින් සම්බන්ධව ලැබී ඇති පැමිණිලි විමර්ශනය කිරීම, අතුරුදහන් වු බවට තහවුරු වු පුද්ගලයින් වෙනුවෙන් හා හානි වු දේපළ වෙනුවෙන් වන්දි ලබාදීම, ආරක්ෂක හමුදා සතුව පවතින පෞද්ගලික ඉඩම් නිදහස් කිරීම මෙන්ම අදාළ ආයතනවල ප්‍රගතිය පිළිබදව මෙහිදී අවධානය යොමු විය.
වසරකට වරක් ජීනීවා මානව හිමිකම් කවුන්සිල සැසිවාරය සදහා සහභාගීවීමේදී මෙරට මානව හිමිකම් සුරක්ෂිත කිරීමට රජය විසින් ගෙන ඇති වැඩ පිළිවෙලෙහි ප්‍රගතිය පිළිබදව වු කරුණු ඉදිරිපත් කළ යුතුව ඇති බැවින් මානව හිමිකම් සුරක්ෂිත කිරීම සඳහා ස්ථාපිත කර ඇති ආයතන ඉදිරියේදී කටයුතු කළයුතු ආකාරය පිළිබදව ද මෙහිදී සාකච්ඡා විය.

ජාතීන් අතර සාමය හා සංහිදියාව වැඩි දියුණු වන ආකාරයට ක්‍රියා කිරීම ඒ සදහා ස්ථාපිත කර ඇති ආයතනවල වගකීමක් බවත්, ජාතික, සමගිය හා ප්‍රතිසන්ධානය සදහා වන කාර්යාලය විසින් සමස්ත දිවයිනම ආවරණය වන පරිදි ඉදිරියේදී හදුන්වාදීමට නියමිත ග්‍රාම රාජ්‍ය සංකල්පය කඩිනමින් ක්‍රියාත්මක කළ යුතු බවත්, අධිකරණ අමාත්‍යතුමා මෙහිදී අවධාරණය කළේය.

විශේෂයෙන් අතුරුදහන් වු තැනැත්තන් පිළිබදව ලැබී ඇති පැමිණිලි සම්බන්ධව කරනු ලබන විමර්ශන කඩිනම් කිරීම, ඔවුන් සදහා අතුරුදහන් වු බවට වන සහතික නිකුත් කිරීම, ගැටුම් හේතුවෙන් හානි වු ජීවිත හා දේපළ වෙනුවෙන් වන්දි ලබාදීමේ කටයුතු විධිමත්ව කඩිනමින් සිදු කරන ලෙස ද අධිකරණ අමාත්‍යතුමා මෙහිදී නිලධාරීන්ට උපදෙස් ලබා දුන්නේය.

සාමය සංහිඳියාව හා ප්‍රතිසංධානය සඳහා වන කාර්යාලයේ අධ්‍යක්ෂක දීප්ති ළමා හේවා, අතුරුදහන් වු තැනැත්තන් පිළිබදව වු කාර්යාලයේ නියෝජ්‍ය අධ්‍යක්ෂක ටී.තවපාලන්, ආරක්ෂක අමාත්‍යාංශය වෙනුවෙන් මේජර් ජනරාල් රුවන් කුලතුංග, හානි පුර්ණ කාර්යාලයේ සභාපතිනී ධාරා විජේතිලක, තිරසර සංවර්ධනය සදහා වන කවුන්සිලයේ අධ්‍යක්ෂ ජනරාල් චාමින්දි සපරමාදු යන මහත්ම මහත්මීන් සිය ආයතන විසින් සාමය, සංහිදියාව ඇති කරලීම සදහා ගෙන ඇති ක්‍රියා මාර්ගයන්හි ප්‍රගතිය පිළිබදව අදහස් පළ කළේය.

ගරු නීතිපති ජනාධිපති නීතිඥ සංජය රාජරත්නම්, අධිකරණ අමාත්‍යාංශයේ ලේකම් වසන්තා පෙරේරා, අධිකරණ, බන්ධනාගාර කටයුතු හා ආණ්ඩුක්‍රම ව්‍යවස්ථා ප්‍රතිසංස්කරණ අමාත්‍යාංශයේ අතිරේක ලේකම්වරුන් වන පියුමන්තී පීරිස් (නීති) , ආර්.පී.එස්.සමන් කුමාරී (ඒකාබද්ධතා) , සාමය සංහිඳියාව හා ප්‍රතිසංධානය සඳහා වන කාර්යාලයේ සභාපති ජේ.ජේ.රත්නසිරි, නියෝජ්‍ය පොලිස්පති අසංග කරවිට, යන මහත්ම මහත්මීන් ඇතුළු අධිකරණ බන්ධනාගාර කටයුතු හා ආණ්ඩුක්‍රම ව්‍යවස්ථා ප්‍රතිසංස්කරණ අමාත්‍යාංශය, විදේශ කටයුතු අමාත්‍යාංශය, ආරක්ෂක අමාත්‍යාංශය, නීතිපති දෙපාර්තමේන්තුව, තිරසර සංවර්ධනය සදහා වන කවුන්සිලය, සාමය සංහිඳියාව හා ප්‍රතිසංධානය සඳහා වන කාර්යාලය නියෝජනය කරමින් නිලධාරීන් මෙම සාකච්ඡාව සදහා එක්ව සිටියහ.