Citizens Services 
Snapshot 
Public Consultation 
ADR 
Legal Educations 
මාධ්ය කාමරය 
MLA
තොරතුරු දැනගැනීමේ අයිතිය 
සංචාරක බංගලා 
Payment Portal 
බාගතකිරීම් 
හැඳින්වීම
අපරාධයක වින්දිතයන් හා සාක්ෂිකරුවන් ආරක්ෂා කිරීම සඳහා විධිමත් නීතිමය වැඩපිළිවෙලක් හඳුන්වා දීම මඟින් අපරාධ යුක්තිය පසිඳලීමේ ක්රියාවලිය සවිබල ගැන්වීම සඳහා පාර්ලිමේන්තුව විසින් සම්මත කරන ලද 2015 අංක 04 දරන අපරාධයක වින්දිතයන් හා සාක්ෂිකරුවන් හට සහාය දීමේ සහ ආරක්ෂා කිරීමේ පනත යටතේ, අපරාධයක වින්දිතයන් හා සාක්ෂිකරුවන්ආරක්ෂා කිරීම සඳහා වූ ජාතික අධිකාරිය පිහිටුවා ඇත.ඒ අනුව බත්තරමුල්ල, ඩෙන්සිල් කොබ්බෑකඩුව මාවතේ අංක 428/11ඒ දරණ ස්ථානයෙහි පිහිටුවනු ලැබූ මෙම අධිකාරිය අතිගරු ජනාධිපතිතුමා විසින් 2016.01.08 වන දින විවෘත කරන ලදි.
පසුව අංක 1966/02 හා 2016.05.09 දිනැති අතිවිශේෂ ගැසට් පත්රයේ පළ කරන ලද නිවේදනය මඟින් උක්ත අධිකාරියෙහි විෂය පථය 2016.04.27 දින සිට ක්රියාත්මක වන පරිදි අධිකරණ අමාත්යංශය වෙත පවරා ඇත.ඒ අනුව ගරු අධිකරණ අමාත්යතුමා විසින් අංක 1967/8 හා 2016.05.16 දිනැති අති විශේෂ ගැසට් පත්රයේ පළ කරන ලද නිවේදනය මඟින් 2015 අංක 04 දරන අපරාධයක වින්දිතයන් හා සාක්ෂිකරුවන් හට සහාය දීමේ සහ ආරක්ෂා කිරීම පනතෙහි සියළු කොටස් වල විධිවිධාන 2016.05.18 දින සිට ක්රියාත්මක කිරීමට නියම කර ඇත.
පනතෙහි IV වන කොටසෙහි 12(1) වගන්තියෙහි විධිවිධාන ප්රකාරව 2016.08.11 වන දින සිට ක්රියාත්මක වන පරිදි අධිකාරියේ කළමනාකරණ මණ්ඩලය පත්කර ඇත. මෙම කළමනාකරණ මණ්ඩලය අපරාධවේදය, අපරාධ යුක්ති පද්ධතිය, මානව හිමිකම් ප්රවර්ධනය හා ආරක්ෂා කිරිම හෝ වෛද්ය විද්යාව ආශ්රිත හෝ ඒ හා සම්බන්ධිත වෘත්තීන් වල අධ්යාපනික හෝ වෘත්තිමය ක්ෂේත්රවල අධ්යාපනික හෝ වෘත්තීය සුදුසුකම් ලත් සහ පළපුරුද්දක් ඇති තැනැත්තන් අතරින් ජනාධිපතිවරයා විසින් තෝරා පත් කරනු ලබන සාමාජිකයින් පස් දෙනෙකුගෙන් හා අධිකරණ අමාත්යාංශයේ ලේකම්, පොලිස් දෙපාර්තමේන්තුව භාර අමාත්යවරයාගේ අමාත්යාංශයේ ලේකම්, කාන්තා කටයුතු විෂය හා ළමා කටයුතු විෂය භාර අමාත්යවරුන්ගේ අමාත්යාංශවල ලේකම්වරු හෝ ඔවුන්ගේ නියෝජිතයින්ගෙන් හා මානව හිමිකම් කොමිෂන් සභාවේ සමාජිකයෙකු, නීතිපතිවරයාගේ නාමිකයෙකු සහ ජ්යෙෂ්ඨ නියෝජ්ය පොලිස්පතිවරයෙකුගේ ධූරය දරන පොලිස්පතිවරයාගේ නාමිකයෙකු ඇතුළත්වන පරිදි නිල බලයෙන් පත්වන සාමාජිකයන් හත් (7) දෙනෙකුගෙන් ද සමන්විත වේ. අතිගරු ජනාධිපතිතුමා විසින්, මණ්ඩලයේ පත් කළ සාමාජිකයෙකු වන සොලිසිටර් ජනරාල් ජනාධිපති නීතීඥ සුහද කේ ගමලත් මහතා කළමනාකරණ මණ්ඩලයේ සභාපතිවරයා හා අධිකාරියේ සභාපතිවරයා ලෙස පත්කර ඇත.
බලතල හා කාර්යභාරය
පනතේ 11 වගන්තිය යටතේ පිහිටුවන ලැබූ මෙම ජාතික අධිකාරියේ බලතල හා කාර්යභාරය පහත සඳහන් පරිදි සංක්ෂිප්තව දැක්විය හැකිය.
- බලාත්මක කිරීමේ කාර්යභාරය - අපරාධයක වින්දිතයන්ගේ සහ සාක්ෂිකරුවන්ගේ හිමිකම් හා අයිතිවාසිකම් හඳුනා ගැනීම, ප්රවර්ධනය කිරිම, ආරක්ෂා කිරිම හා දැනුවත් කිරීම.
- අර්ධ අධිකරණ කාර්යභාරය - ඔවුන්ගේ හිමිකම් හා අයිතිවාසිකම් කඩවිම් පිළිබඳ පැමිණිලි විමර්ෂණ කිරීම හා පරීක්ෂා කිරීම, රාජ්ය ආයතන වලට, රාජ්ය නිලධාරීන්ට හා අධිකරණයට නිර්දේශ ඉදිරිපත් කිරීම.
- ක්රියාත්මක කිරීමේ කාර්යභාරය - අපරාධයක වින්දිතයන්ට හා සාක්ෂිකරුවන්ට ආරක්ෂාව සැලසීම
- නියාමන කාර්යභාරය - නියමු උපදේශන නිකුත් කිරීම හා අධික්ෂණය
අපරාධයක වින්දිතයන්ගේ හා සාක්ෂිකරුවන්ගේ සහායක සහ ආරක්ෂක කොට්ඨාශය
2015 අංක 4 දරණ පනතෙහි පිහිටුවන ලබන අනෙකුත් විශේෂිත ඒකකය වනුයේ ජාතික අධිකාරියේ උපදේශනය හා මඟපෙන්වීම මත ශ්රී ලංකා පොලිසිය යටතේ පිහිටුවන ලබන “අපරාධයක වින්දිතයන්ගේ හා සාක්ෂිකරුවන්ගේ සහායක සහ ආරක්ෂක කොට්ඨාශය” ලෙස හැඳින්වෙන විශේෂ ඒකකයයි. පනතේ 19 (2) වගන්තිය යටතේ කළමනාකරණ මණ්ඩලයට නිළ බලයෙන් පත් කෙරෙන ජ්යෙෂ්ඨ නියෝජ්ය පොලිස්පතිවරයාගේ අධීක්ෂණය යටතේ ක්රියා කරන ජ්යෙෂ්ඨ පොලිස් අධිකාරී වරයෙකු මෙම කොට්ඨාශය භාර ප්රධානියා ලෙස පත්කල යුතුය.
අපරාධයක වින්දිතයෙකුට සහ සාක්ෂිකරුවෙකුට පනත යටතේ ආරක්ෂාව ඉල්ලුම් කළහැකි ආයතන
- අපරාධයක වින්දිතයන් සහ සාක්ෂිකරුවන් ආරක්ෂා කිරීම සඳහා වූ ජාතික අධිකාරිය
- අපරාධයක වින්දිතයන්ගේ හා සාක්ෂිකරුවන්ගේ සහායක සහ ආරක්ෂක කොට්ඨාශය
- අධිකරණය
- කොමිසම - (මානව හිමිකම් කොමිසම, අල්ලස් හෝ දූෂණ විමර්ෂණ කිරීමේ කොමිසම් සභාව සහ පරීක්ෂණ කොමිෂන් සභා පනත් යටතේ පත් කරනු ලබන පරීක්ෂණ කොමිෂන් සභා හෝ ජනාධිපති විශේෂ පරීක්ෂණ කොමිෂන් සභා)
- ප්රදේශයේ පොලිස් ස්ථානාධිපති වරයාට
වැඩි විස්තර සඳහා ආයතනයේ වෙබ් අඩවියට පිවිසීමට : අපරාධයක වින්දිතයන් සහ සාක්ෂිකරුවන් ආරක්ෂා කිරීම සඳහා වූ ජාතික අධිකාරිය
නීති විද්යාලය
ශ්රී ලංකා නීතිඥ මඩුල්ලට තමන්ගේ නම ඇතුලත් කර ගැනීමට කැමති අයවලුන් හට පවත්වනු ලබන නීති අධ්යපනය පාලනය කිරීම සඳහා 1900 අංක 02 දරණ සංස්ථාගත නීති අධ්යපන සභා පනත ප්රකාරව ශ්රී ලංකා නීති විද්යාලය ක්රියා කරනු ලබයි. සංස්ථාගත නීති අධ්යාපන සභාවේ සභාපතිත්වය ගරු අගවිනිසුරු තුමා විසින් හොබවන අතර ගරු නීතිපතිතුමා, ගරු සොලිසිටර් ජනරාල්තුමා හා අධිකරණ අමාත්යාංශයේ ලේකම්තුමා හා අගවිනිසුරුතුමා විසින් නම් කරනු ලබන ශ්රේෂ්ඨාධිකරණ විනිසුරුවන් දෙදෙනෙකුගෙන්ද, ගරු අධිකරණ අමාත්යතුමා විසින් පත් කරනු ලබන සාමාජිකයන් හය දෙනෙකුගෙන් හා ශ්රී ලංකා නීතිඥ සංගමයේ සාමාජිකයන් දෙදෙනෙකුගෙන් සභාව සමන්විත වෙයි.
නීති විද්යාලය වසර 3 ½ ක පාඨමාලාවක් පවත්වන අතර එක් එක් වසර අවසානයේ පරීක්ෂණ තුනක්, එනම් ප්රථම, මධ්යම හා අවසාන වසර සඳහා පරීක්ෂණ පවත්වනු ලබයි. එම විභාග සමත්වන අපේක්ෂකයින් නීතිඥයන් ලෙස දිවුරුම් දීමට ශ්රේෂ්ඨාධිකරණයට ඉල්ලුම් කිරීමට පෙර අවුරුදු 08ක අවම පළපුරුද්ද සහිත ජ්යෙෂ්ඨ නීතිඥවරයෙකු යටතේ මාස 06ක ආධුනික කාලයක් ගත කිරීම අවශ්ය වෙයි.
මෙම ආයතනය ස්වයං මූල්ය සංවිධානයක් ලෙස ක්රියාත්මක වේ. එසේම බාහිර කථිකාචාර්යවරුන් ලෙස නීතිඥ වෘත්තියේ යෙදෙන හා සමාගම්වල සේවයේ නියුතු අය බඳවා ගැනේ. ඔවුන් ජනාධිපති නීතිඥවරුන් හෝ පළපුරුදු නීතිඥවරුන් වේ.
අංක. 244 අලුත්කඩේ වීදිය,
තැ.පෙ. 1501,
කොළඹ 12.
+94 112 473 119/ 323759
+94 112 385 847
ශ්රි ලංකා නීති විද්යාලයීය වෙබ් අඩවිය පිවිසෙන්න
ශ්රී ලංකා විනිශ්චයකාරවරයන්ගේ ආයතනය 1985 අංක 46 දරණ පනත යටතේ පිහිටුවා ඇත. මෙම ආයතනයේ පරිපාලනය කළමනාකරණ මණ්ඩලයක් මගින් සිදුවේ. එහි කළමනාකාරිත්වය අගවිනිසුරුතුමා සහ අතිගරු ජනාධිපතිතුමා විසින් පත් කරන ලද ශ්රේෂ්ඨාධිකරණ විනිසුරුවන් දෙදෙනෙකුගෙන් සැදුම්ලත් සාමාජිකයන් 05 දෙනෙකුගෙන් සමන්විත වේ. මෙම ආයතනයට අවශ්ය ප්රතිපාදන අධිකරණ අමාත්යාංශය මගින් වෙන් කරනු ලැබේ.
ආයතනයේ විෂයයන් හා කාර්යයන්:-
- අධිකරණ නිලධාරීන් අතර අධිකරණමය සහ නෛතික කාරණා සම්බන්ධයෙන් මත සහ අදහස් හුවමාරු කර ගැනීමට පහසුකම් සැලැස්වීම.
- අධිකරණ නිලධරන්ගේ වෘත්තීය ප්රවීණත්වය වැඩි දියුණු නිරිමේ සහ ඔවුන්ගේ දැනුම සහ කෞශල්යය වර්ධනය කිරිමේ අදහසින් රුස්විම්, සම්මේලන, දේශන, වැඩමුළු හා සම්මන්ත්රණ සංවිධානය කිරිම සහ පැවැත්විම.
- යුක්තිය පසිඳලිම පිළිබඳ විවිධ අංශ සම්බන්ධයෙන් පුහුණුවීමේ සහ පර්යේෂණ පාඨමාලා සකස් කිරිම සහ පැවැත්වීම.
- අධිකරණ නිලධරයන් සඳහා පුස්තකාල පහසුකම් හා වෙනත් අධ්යාපනික උපකරණ සැපයීම.
ශ්රී ලංකා විනිශ්චයකාරවරයන්ගේ ආයතනය වෙබ් අඩවියට පිවිසෙන්න
නීති ආධාර කොමිෂන් සභාව 1978 අංක 27 දරණ නීති ආධාර පනත මගින් ස්ථාපිත කරන ලදි. දරිද්රතාව නිසා යුක්තියේ පිළිසරණ ලබා ගැනිමට නොහැකි වු ශ්රී ලංකාවේ දුගි ජන කොටස් සඳහා නීති ආධාර සැපයීම මෙහි ප්රධාන අරමුණ වේ. අඩු ආදායම්ලාභී ජනතාවට නොමිලේ නීතිඥ සහාය ලබාදීම, සමස්ත සමාජයම නීතිය පිළිබඳව දැනුවත් කිරීම, නව නීති සම්පාදනයේදී හා නෛතික නීති ප්රතිසංස්කරණවලදී රජයට උපදේශන කාර්යයේ නිරතවීම යනාදිය මෙහි මුලික කාර්යභාරයන් වේ.
නීති අංශය:
- යුක්තියේ පිළිසරණ ලබා ගැනිමට හැකියාවක් නොමැති තැනැත්තන් වෙනුවෙන් අධිකරණයේ පෙනී සිටිම.
- ඕනෑම කෙනෙකුට නොමිලේ නීති උපදෙස් ලබාදීම.
- නව නීති සම්පාදනයේදී හා නීති ප්රතිසංස්කරණවලදී රජයට උපදේශණ කාර්යයේ නිරතවීම.
සෘජුව ප්රධාන කාර්යාලය යටතේ ක්රියාත්මක කොළඹ නීති ආධාර මධ්යස්ථානය ඇතුළුව නීති ආධාර කාර්යාල 77 ක් වේ. අධිකරණමය නීති කෘත්යයන් සදහා ප්රාදේශීය ග්රාම නිලධාරිවරයා මඟින් කැඳවු ආදායම් වාර්තා සලකා බලන නමුත් නඩත්තු නඩුවලදී ඒ පිළිබඳව සලකා බලනු නොලැබේ.
ශ්රී ලංකා නීති ආධාර කොමිෂන් සභාව
අංක 129, අලුත්කඩේ වීදිය,
කොළඹ - 12,
ශ්රී ලංකාව.
+94 115 335 329/ +94 115 335 281
+94 112 433 618
ශ්රි ලංකා නීති ආධාර කොමිෂන් සභාව වෙබ් අඩවියට පිවිසෙන්න
